
Aleinde Kafé
Potensialidade esportasaun produtu-agríkola hosi Timor-Leste.
Enkuantu mundu hahú mudansa substansiál ba enerjia renovável, Timor-Leste kontinua depende nafatin ba rekursu petróleu no gás hodi sustenta ninia ekonomia. Liu kedas porsentu 90 hosi totál esportasaun, no liu porsentu 80 hosi governu nia reseita ne’e mak hosi rekursu petróleu no gás.1 Maski nune’e, rekursu hirak-ne’e prevee atu hotu to’o tinan-2034.2 Enkuantu ekonomia krexe ona iha tinan hirak foin-daudaun ne’e, ida-ne’e impulsiona hosi governu nia gastu, ne’ebé sai nu’udar prátika insustentável ida iha longu-prazu. Iha konsensu ida katak Timor-Leste tenki diversifika ninia baze ekonómika. Aleinde indústria petrolífera, governu nia planu estratéjiku prioriza investimentu iha setór agrikultura no turizmu. Atualmente, Timor-Leste nia esportasaun naun-petrolífera ne’ebé boot liuhotu mak produtu agríkola. Produtu hirak-ne’e kontribui de’it 5% hosi país ne’e nia totál esportasaun.

